காக்காமுட்டை என்ற தமிழ் திரைப்படத்தின் மீது தமிழின் அனைத்து அறிவுசார் உணர்வுசார் எந்திரங்களின் ஒளிப்பாய்ச்சல்களும் இயக்கங்களும் அரைபடத்துவங்கியபோது பெருவாரியான வாசகங்களில் வெளிப்பட்டது இரண்டு கூற்றுகளே. ஒன்று உலகப்படத்தின் தரத்தை எட்டிவிட்டது. இரண்டு சேரிவாழ் மக்களின் யதார்த்தத்தை அப்படியே திரையில் விரித்துவிட்டது. உபபிரதியாக அத்திரைப்படத்தை எதிர்த்து பேசுபவர்கள் அறிவுஜீவிகளாக தங்களை காட்டிக் கொள்பவர்கள் என்கிற முகநூல் வாசகம் துவங்கி பல சினிமா இதழ்களின் சிறப்பு மலர்களில் வந்த சிந்தனையை தூண்டும் கட்டுரைகள் வரை அந்த அரைபடல் எந்திரங்களின் அங்கமாக வெளிப்பட்டது. இனி அத்திரைப்படம்பற்றி எழுத என்ன உள்ளது என்பதுவரை எழுதி தள்ளப்பட்டுவிட்ட ஒரே தமிழ்த் திரைப்படம் என்ற சிறப்பை பல விருதுகளுக்கு மத்தியில் பெற்றது என்பது தமிழர்களாக அடையாளமானவர்களுக்கு பெருமிதம் தரக்கூடிய ஒன்றே.
இப்பெருமிதங்களுக்கிடையில் காக்கா முட்டை அறிவுஜீவிகளுக்கான படம் இல்லை என்று சினிமா பத்திரிக்கைகள் சிலாகிக்கின்றன. அறிவுஜீவிகளுக்கான படம் என்னவாக இருக்கும்? அல்லது சினிமாவில் அறிவுஜீவிகளுக்கானது, பாமரர்களுக்கானது, படித்தவர்களுக்கானது, முட்டாள்களுக்கானது என்ற வகைத்திணை எதாவது உண்டா?
முன்சொன்ன முதல்வாசகத்தில் தடுத்தோ தடுக்கியோ விழுந்துவிட்ட சொல்லான உலகப்படம் என்ற சொல் எதன் குறியீடாக மற்றும் எதன் குறிப்பீடாக பொருள் கொள்ளப்படுகிது, அப்பொருள்கொள்தலின் அரசியல் என்ன?
0 comments: